ភ្នំពេញៈ ម្នាក់ក្នុងចំណោមមេបំផុសគំនិតឲ្យមានការវាយប្រហារដ៏ឃោរឃៅ ទៅលើសាស្ត្រាចារ្យមួយរូប កាលពីថ្ងៃអាទិត្យត្រូវបានកំណត់អត្តសញ្ញាណបានហើយកាលពីថ្ងៃម្សិលមិញ ដែលគេអះអាងថាគឺជាកម្លាំងសន្តិសុខខណ្ឌដូនពេញ។ នៅក្នុងវីដេអូជាច្រើនដែលបានបង្ហាញអំពីការវាយប្រហារនោះ គឺឃើញមានសន្តិសុខម្នាក់ដែលគេកំណត់អត្តសញ្ញាណថា មានឈ្មោះ ភាព គឹមហាក់ ដែលពាក់អាវយឺតពណ៌ខៀវខ្ទីនឹងស្លៀកខោក៏ដូចជាពាក់ខ្សែក្រវាត់លក្ខណៈឯកសណ្ឋានសន្តិសុខ។
កាលពីល្ងាចថ្ងៃអាទិត្យលោក ស៊ុយ សារ៉េត អាយុ ៥២ ឆ្នាំជាសាស្ត្រាចារ្យភាសាអង់គ្លេសនៅសាកលវិទ្យាល័យកម្ពុជាត្រូវបានគេជឿថា បានជិះរថយន្តទៅបុកបុរសម្នាក់ដែលកំពុងជិះម៉ូតូឈ្មោះ សឿ សេង បណ្តាលឲ្យរងរបួសនៅខណ្ឌឫស្សីកែវ។
ក្រោយមកលោក សារ៉េត បានបើករថយន្តគេចចេញពីកន្លែងកើតហេតុ ហើយសាក្សីដែលមានកំហឹងបានដេញតាមគាត់រហូតដល់ខណ្ឌទួលគោកដោយពួកគេបានស្រែកថា គាត់បានបុកឈ្មោះ សេង ស្លាប់ ហើយបើករត់។ អ្វីដែលកើតឡើងបន្ទាប់គឺហ្វួងមនុស្សជាច្រើននាក់បាននាំគ្នាវាយប្រហារយ៉ាងសាហាវឃោរឃៅទៅលើលោក សារ៉េត ដោយអ្នកខ្លះប្រើដំបងដុំថ្មមួកសុវត្តិភាពវាយដំលើផ្ទៃមុខរាងកាយហើយអ្នកខ្លះទៀតព្យាយាមទាញដៃគាត់ឲ្យកៀបនឹងទ្វាររថយន្ត ចំណែកអ្នកខ្លះទៀតបានឡើងឈរលើរថយន្តធាក់កញ្ចក់រថយន្ត និងវាយតួរថយន្តទាំងមូលតែម្តង។
នៅក្នុងវីដេអូសុវត្ថិភាព CCTV និងវីដេអូជាច្រើនផ្សេងទៀតពីកន្លែងកើតហេតុ បានបង្ហាញថាបុរស ៤ នាក់ត្រូវបានគេមើលឃើញថាបានបំផុសឲ្យមានការវាយប្រហារដ៏ឃោរឃៅនេះ។ ក្នុងចំណោមពួកគេគឺមានបុរសម្នាក់ឈ្មោះ គឹមហាក់ ដែលគេឃើញបង្ហាញសកម្មភាពដ៏ហិង្សានៅក្នុងការវាយប្រហារនោះ។
បើទោះបីជាមុខរបស់ជនល្មើសជាច្រើនត្រូវបានគេមើលឃើញយ៉ាងច្បាស់នៅក្នុងវីដេអូជាច្រើនក្តីក៏រហូតមកដល់ថ្ងៃម្សិលមិញនៅមិនទាន់មានការចាប់ខ្លួនជនសង្ស័យណាម្នាក់នៅឡើយទេ។
ប៉ុន្តែលោក សែម សុគន្ធា នាយរងការិយាល័យនគរបាលចរាចរណ៍ផ្លូវគោករាជធានីភ្នំពេញមិនបានបញ្ជាក់ថាមានជនសង្ស័យ ប៉ុន្មាននាក់ដែលប៉ូលិសកំពុងតាមដានទេ។ «យើងមិនអាចបង្ហាញបានទេ ពីព្រោះវាកំពុងស្ថិតនៅក្រោមការស៊ើបអង្កេតហើយនៅពេលយើងប្រាប់ថា យើងបានចាប់ខ្លួនចំនួន ... វាអាចធ្វើឲ្យពួកគេដឹង»។
លោកថាជនរងគ្រោះជិះម៉ូតូមានឈ្មោះ សេង ត្រូវបានបញ្ជូនទៅកាន់គ្លីនិកហុងហាក់ ដើម្បីព្យាបាលរបួសខ្នង និងជើងរបស់គាត់ ដូចលោក សារ៉េត ដែរមុនពេលត្រូវបានបញ្ជូនទៅកាន់ប្រទេសវៀតណាម។
កូនស្រីរបស់លោក សេង ឈ្មោះអ្នកស្រី សាន សឿជូ អាយុ ៣០ ឆ្នាំបានឲ្យដឹងថា ជើងរបស់ឪពុកអ្នកស្រីបានបាក់ ២ កន្លែង និងនៅមានរបួសស្រាលផ្សេងៗទៀត ប៉ុន្តែគ្រូពេទ្យរំពឹងថាគាត់អាចនឹងជានៅក្នុងរយៈពេល ៥ ទៅ ៦ ខែ។ «គ្រួសាររបស់លោក សារ៉េត បានទាក់ទងគ្រួសារខ្ញុំហើយបានសន្យាថា នឹងផ្តល់សំណង»។
អ្នកស្រីបន្តថា៖ «គាត់ខុសហើយគាត់មិនគួររត់ទេ ប៉ុន្តែចំពោះអ្នកដែលបានវាយដំគាត់ គឺនៅពេលពួកគេខឹង... នេះគឺពិតជាឃោរឃៅណាស់ពួកគេចង់វាយគាត់ដល់ស្លាប់»។
អ្នកស្រីបន្ថែមថាហ្វួងមនុស្សដែលវាយដំគាត់គឺកាន់តែអាក្រក់ជាងគាត់ទៀត។ «នៅឯមន្ទីរពេទ្យនៅពេលដែលខ្ញុំឃើញគាត់ ខ្ញុំអាណិតគាត់ណាស់...ដុំថ្មធំៗបែបនេះអាចសម្លាប់គាត់បាន»។
លោក ផែង វណ្ណៈ មន្ត្រីជាន់ខ្ពស់នៅក្រសួងមហាផ្ទៃបានបង្ហាញអំពីអត្តសញ្ញាណរបស់ គីមហាក់ នៅលើហ្វេសប៊ុក និងថ្លែងថា នគរបាលបានបញ្ជាឲ្យអាជ្ញាធរខេត្តបាត់ដំបងកំណត់ទីកន្លែងរបស់គាត់។
ស្នងការរងខេត្តបាត់ដំបងលោក ចែត វន្នី ថ្លែងថាលោកបានទាក់ទងអាជ្ញាធររាជធានីភ្នំពេញ ដើម្បីនិយាយថាពួកគេមិនបានរកឃើញ គីមហាក់ ទេ។ លោកបន្តថា៖ «យើងបានដុតដៃដុតជើង យកចិត្តទុកដាក់ចំពោះករណីនេះ»។
មន្ត្រីនគរបាលក្រុងបាត់ដំបងម្នាក់ដែលសុំមិនបញ្ចេញឈ្មោះបានថ្លែងថា គីមហាក់ បានទៅនៅរាជធានីភ្នំពេញមួយឆ្នាំមុន ហើយមិនបានត្រឡប់មកវិញចាប់តាំងពីពេលនោះមក។
ក្នុងសេចក្តីថ្លែងការណ៍មួយ រដ្ឋបាលខណ្ឌដូនពេញបានផ្តាច់ខ្លួនចេញពី គីមហាក់ ដោយលើកឡើងថាគាត់ជា «អតីត» សន្តិសុខខណ្ឌ។ ពួកគេថ្លែងថា គាត់បានប្រព្រឹត្តជាលក្ខណៈបុគ្គល ហើយពួកគេមិនបានគាំទ្រអំពើហិង្សារបស់គាត់ទេ។
កម្លាំងសន្តិសុខខណ្ឌដូនពេញបានល្បីខាងប្រើអំពើហិង្សាកាលពីអតីតកាល នៅក្នុងការបង្ក្រាបបង្ហូរឈាមទៅលើអ្នកតវ៉ាអហិង្សារួមមានសកម្មជនបឹងកក់។
អ្នកនាំពាក្យនគរបាល និងអ្នកនាំពាក្យខណ្ឌមិនអាចទាក់ទងសុំអត្ថាធិប្បាយបានទេកាលពីម្សិលមិញ ប៉ុន្តែនៅក្នុងសេចក្តីថ្លែងការណ៍មួយ នគរបាលរាជធានីបានថ្កោលទោសអំពើហិង្សានេះដោយថ្លែងថា វាផ្ទុយនឹងច្បាប់ «សីលធម៌សង្គម» និងប្រពៃណីជា «អ្នកកាន់ព្រះពុទ្ធសាសនា» របស់កម្ពុជា។
ពួកគេបានអំពាវនាវឲ្យមានការបញ្ឈប់ភ្លាមៗចំពោះការវាយប្រហារហិង្សាទៅលើអ្នកបើករថយន្ត និងបានជំរុញឲ្យសាក្សីប្រគល់ជនសង្ស័យទៅនគរបាលទៅតាមនីតិវិធីច្បាប់។ បទល្មើសបុករត់ដែលបណ្តាលឲ្យមានរបួសធ្ងន់អាចត្រូវដាក់ទោសជាប់ពន្ធនាគារពី ១ ទៅ ៣ ឆ្នាំ។
អ្នកវិភាគសង្គមលោក មាស នី បានថ្លែងថាឧប្បត្តិហេតុដូចនេះគឺជាផ្នែកនៃ «វដ្តហិង្សា»។
លោកថ្លែងថា៖ «មូលហេតុដែលអ្នកបើកឡានមានអារម្មណ៍ថា ពួកគេត្រូវតែរត់ គឺមិនមែនដោយសារពួកគេភ័យខ្លាចការចាប់ខ្លួនទេ ប៉ុន្តែដោយសារពួកគេភ័យខ្លាចថា ពួកគេនឹងត្រូវគេវ៉ៃ...ពួកគេត្រូវតែរត់ដើម្បីជីវិតរបស់ខ្លួន»។
លោកថា ការពាក់ព័ន្ធរបស់អតីតសន្តិសុខខណ្ឌដូនពេញគឺជាក្តីបារម្ភមួយសម្រាប់សាធារណជនដោយសារពួកគេទទួលបានការបណ្តុះបណ្តាលតិចតួច ឬក៏ «ទទួលបានការបណ្តុះបណ្តាលឲ្យបង្កើតហិង្សាជាងមុន»៕
ប្រភព៖ ការសែតភ្នំពេញប៉ុស្តិ៍ (https://goo.gl/TJZzvs)
តាមរយៈវីដេអូបានបង្ហាញថា ហ្វូងមនុស្សជាច្រើននាក់ពោរពេញទៅដោយកំហឹងបានជិះម៉ូតូដេញតាមរថយន្តរបស់លោកសាស្ត្រាចារ្យ ស៊ុយ សារ៉េត ដោយបុគ្គលម្នាក់ៗមានទាំងដុំឥដ្ឋ ដុំថ្មវាយ គប់ទៅលើគាត់។ ក្រោយមកលោក សារ៉េត ត្រូវបានបញ្ជូនទៅព្យាបាលនៅប្រទេសវៀតណាម។
.jpg "ច្បាប់ការងារសម្រាប់ស្រ្តីមានផ្ទៃពោះ")