ហេតុអ្វីបានជាប្រជាជនជាតិជប៉ុនអាយុវែង??

Wednesday, June 7, 2017

ហេតុអ្វីបានជាប្រជាជនជាតិជប៉ុនអាយុវែង??

ជាការពិតណាស់បើនិយាយពីសេដ្ឋកិច្ចប្រទេសជប៉ុនជាប្រទេសមួយដែលមានសេដ្ឋកិច្ចធំលំដាប់ទីបីនៅក្នុងពិភពលោកបន្ទាប់ពីសហរដ្ឋអាមេរិកនិងចិន។ក្រៅពីមានសេដ្ឋកិច្ចដ៏រឹងមាំហើយនោះជប៉ុនក៏ជាប្រទេសមួយដែលប្រជាជនមានអាយុវែងបំផុតនៅក្នុងពិភពលោកដែរ។ អាយុជាមធ្យមរបស់ប្រជាជនគឺ៨៥.២៦ឆ្នាំ។ មានហេតុផលមួយចំនួនដែលធ្វើឲ្យប្រជាជនជប៉ុនអាយុវែង៖

Ø ជនជាតិជប៉ុនបរិភោគបន្លែច្រើនបំផុត

ជាប្រពៃណីជនជាតិជប៉ុនបរិភោគបាយបន្លែនិងត្រីច្រើនបំផុត អមជាមួយនឹងសណ្តែកសៀងផ្អាប់នឹង និងសារ៉ាយសមុទ្រ។ ដូច្នោះហើយជនជាតិជប៉ុនទទូលទានបានវីតាមីនសារធាតុរ៉ែពីរុក្ខជាតិដែលមានប្រយោជន៍ដល់រាងកាយគ្រប់គ្រាន់។

Ø ជនជាតិជប៉ុនចូលចិត្តទទូលទានអាហារច្រើនមុខខុសៗគ្នា

ជនជាតិជប៉ុនចូលចិត្តបរិភោគអាហារច្រើនមុខខុសៗគ្នាក្នុងពេលតែមួយ ដែលក្នុងនោះមានដូចជាប្រភេទ អាហារ ចំហុយ ស្ងោរ ចៀន ឆា អាំង ជាដើម។ ជាទម្លាប់យ៉ាងហោចណាស់ពួកគេចម្អិនស៊ុបមួយកូនចានធ្វើពីត្រីនិងបន្លែផ្សេងៗដែលផ្តល់អហារប្រភេទសរសៃ Fiber បានគ្រប់គ្រាន់។

Ø ជនជាតិជប៉ុនចូលចិត្តផឹកទឹកតែ

ការទទូលទានទឹកតែជាវប្បធម៌ដ៏សំខាន់មួយនៅក្នុងប្រទេសជប៉ុន។ តែជប៉ុនមានគុណភាពល្អដែលមានសារធាតុប្រឆាំងអុកស៊ីតកម្មច្រើនជាងកាហ្វេឆ្ងាយ។

Ø អាហាររបស់ជនជាតិជប៉ុនភាគច្រើនគឺស្រស់ៗ

អាហារជនជាតិជប៉ុនភាគច្រើនបំផុតគឺស្រស់ៗមិនថាត្រីសាច់ឬបន្លែផ្លែឈើនោះទេ។ ពួកគេត្រូវតែប្រាកដថាអាហារដែលចូលក្នុងមាត់របស់ពួគេត្រូវតែស្រស់ គ្មានជាតិគីមីនិងផ្តល់ផលប្រយោជន៍ចំពោះសុខភាព។

Ø ចានដាក់អាហាររបស់ជនជាតិជប៉ុនគឺមានទំហំតួច

ការគ្រប់គ្រងបរិមាណអាហារគឺជាផ្នែកមួយនៃប្រពៃណីជប៉ុន។ ជនជាតិជប៉ុនចូលចិត្តប្រើប្រាស់ចានដាក់អាហារមានទំហំតួចតែមានច្រើនប្រភេទខុសៗគ្នា ដើម្បីឲ្យប្រាកដថាអាហារមួយពេលៗរបស់ពួកគេគឺជាអាហារដែលមានគ្រប់សារធាតុចិញ្ចឹម។

Ø ដើរ, ឈរ, រត់

ការដើរ ការ ឈរ ការត់ ជាផ្នែកមួយ នៃជីវិតប្រចាំថ្ងៃ របស់ជនជាតិជប៉ុន ពីព្រោះពេលភ្ញាក់ពីដេក ធ្វើដំណើរទៅធ្វើការពួកគេត្រូវដើរទៅស្ថានីយ៍រថភ្លើង,ឈរចាំ រថភ្លើងឈរក្នុងរថភ្លើងហើយពេលធ្វើការគឺគេស្វាហាប់ណាស់ បើត្រូវរត់គឺរត់។ អញ្ចឹងហើយជនជាតិជប៉ុនធ្វើចលនាបានច្រើនតាមរយៈសកម្មភាពប្រចាំថ្ងៃរបស់ខ្លួន។

Ø ហាត់ប្រាណទៀងទាត់

ជនជាតិជប៉ុនចូលចិត្តហាត់ប្រាណបានទៀងទាត់ ជាពិសេសពេលព្រឹក គេមានកម្មវិធីហាត់ប្រាណតាមវិទ្យុ។ ការហាត់ប្រាណទៀងទាត់បានធ្វើឲ្យជនជាតិជប៉ុនមានសុខភាពល្អមិនងាយឈឺថ្កាត់នោះទេ។

Ø ជនជាតិជប៉ុនទទូលបានសេវាថែទាំសុខភាពលំដាប់ពិភពលោក

សេវាថែទាំសុខភាពរបស់ជប៉ុនគឺមានស្តង់ដាខ្ពស់ណាស់។ ប្រជាជនជប៉ុនទៅពិនិត្យសុខភាពនៅមន្ទីរពេទ្យជាច្រើនដងក្នុងមួយឆ្នាំៗដើម្បីតាមដានសុខភាពរបស់ពួគេទោះបីមិនមានជម្ងឺអ្វីក៏ដោយ។

Ø យកចិត្តទុកដាក់បំផុតចំពោះភាពស្អាត

ភាពស្អាតគឺជាអ្វីដែលប្រជាជនជប៉ុនប្រកាន់ខ្ជាប់។ នៅជប៉ុនមិនមានសំរាមរាយប៉ាយនៅតាមផ្លូវសាធារណៈនោះទេ។គ្រប់ទីកន្លែងគឺស្អាតមិនមានសំរាមឡើយ។ដូច្នេះវាចូលរួមចំណែកធ្វើឲ្យបរិយាកាសរស់នៅកាន់តែល្អប្រើសើរ។